✍️ ಮಾಚಯ್ಯ ಎಂ ಹಿಪ್ಪರಗಿ
ಹೌದು, ಖಂಡಿತ….
ಸೋತು ನೋವಿನಲ್ಲಿದ್ದ ತಂಡವನು
ಡ್ರೆಸ್ ರೂಮಿಗೆ ಹೋಗಿ
ಅವರು ಸಂತೈಸಲೇಬೇಕಿತ್ತು
ಯಾಕೆಂದರೆ, ಅವರೊಬ್ಬ ಪ್ರಧಾನಿ
ಅದು ಅವರ ಹೊಣೆ!
ಜೊತೆಗೆ,
ಅವರು ಮಣಿಪುರಕ್ಕೂ ತೆರಳಬೇಕಿತ್ತು;
ನಡುಬೀದಿಯಲ್ಲಿ ಬೆತ್ತಲೆಗೊಳಿಸಲ್ಪಟ್ಟ
ಆ ಇಬ್ಬರು ತಾಯಂದಿರನ್ನು
ಸಂತೈಸಲು…
ಅವರು, ದಿಲ್ಲಿಯ ನಡುಬೀದಿಯನ್ನೂ ತಾಕಬೇಕಿತ್ತು;
ತಮ್ಮ ಮೇಲಾದ ದೌರ್ಜನ್ಯವ
ಖಂಡಿಸಿ ಪ್ರತಿಭಟಿಸುತ್ತಿದ್ದ
ಮಹಿಳಾ ಕುಸ್ತಿಪಟುಗಳ
ಸಂತೈಸಲು….
ಹತ್ರಾಸ್, ಉನ್ನಾವೊ,
ಕಥುವಾಗಳಿಗೂ ತೆರಳಬೇಕಿತ್ತು;
ಅಮಾನುಷ ಅತ್ಯಾಚಾರಕ್ಕೆ ತುತ್ತಾಗಿ
ಪ್ರಾಣ ಕಳೆದುಕೊಂಡ ಆ ಆತ್ಮಗಳನು
ಸಂತೈಸಲು….
ಯಾಕೆಂದರೆ,
ಈ ಎಲ್ಲರಿಗೂ ಇವರೇ
ಪ್ರಧಾನಿಯಾಗಿದ್ದರು;
ಕರ್ತವ್ಯಗಳು ಅಲ್ಲಿಯೂ ಇವರಿಗೆ
ಕೈಬೀಸಿದ್ದವು….
ಕಾಣುವುದು ಕಣ್ಣಾದರೂ
ಅರಿಯುವುದು ಮೆದುಳು;
ಕಣ್ಣಿಗೆ ಪೊರೆ ಮುತ್ತಿದರೂ
ಮೆದುಳಿಗೆ ಮಂಪರು ಅಡರದಿರಲಿ;
ನಾಟಕವನು ಕಂಡ ನಂತರವೂ
ಬೂಟಾಟಿಕೆಗೆ ನಮ್ಮ ತಲೆ ತೂಗದಿರಲಿ




