ರೈತನ ದೇಹ ಹೊತ್ತಿ ಉರಿಯುತ್ತಿತ್ತು
ಕಣ್ಣುಗಳು ಜ್ವಾಲೆಯನ್ನೆ ಉಗುಳುತ್ತಿದ್ದವು
ಜ್ವಾಲೆ ಸುಡದೆ ಬಿಡಬಹುದೇ ನಿಮ್ಮನ್ನು ?
ರೈತನ ದೇಹ ಹೊತ್ತಿ ಉರಿಯುತ್ತಿತ್ತು
ಹೃದಯ ಕಣ್ಣೀರ ಹನಿ ಸುರಿಸುತ್ತಿತ್ತು
ಕಣ್ಣೀರ ಪ್ರವಾಹ ಮುಳುಗಿಸದೇ ನಿಮ್ಮನ್ನು ?
ರೈತನ ದೇಹ ಹೊತ್ತಿ ಉರಿಯುತ್ತಿತ್ತು
ಬಟ್ಟೆಗಳೆಲ್ಲ ಬೂದಿಯಾಗಿ ಮಣ್ಣಲ್ಲಿ ಸೇರಿದವು
ಆ ಮಣ್ಣು ತಿನ್ನದೆ ಬಿಡಬಹುದೇ ನಿಮ್ಮನ್ನು?
ರೈತನ ದೇಹ ಹೊತ್ತಿ ಉರಿಯುತ್ತಿತ್ತು
ಭಾವಗಳೆಲ್ಲ ದನಿಯಾಗಲಾರದೆ ಮೌನವಾಗಿದ್ದವು
ಆ ಮೌನ ಕಾಡದೆ ಬಿಡಬಹುದೇ ನಿಮ್ಮನ್ನು ?
– ಶಿವಕುಮಾರ ಆರಾಧ್ಯ ಎಂ ಎನ್




