ಒಂದು ಸಾವನ್ನು ಯಾಕೆ ನೆನಪಿಡಬೇಕು?
ಯಾಕೆಂದರೆ ಅದು ಸಹಜ ಸಾವಾಗಿರಲಿಲ್ಲ.
ಅದು ಉಸಿರು ನಿಲ್ಲಿಸುವ ಸಂಚಾಗಿತ್ತು,
ಅದು ಚಿಂತನೆಯ ಬೆದರಿಸುವುದಾಗಿತ್ತು.
ಹಂಚಿಕಡ್ಡಿಯಂಥಾ ದೇಹದೊಳಗಿನ
ದೈತ್ಯ ಚೈತನ್ಯಕ್ಕೆ ಬೆದರಿದವರ ಹೇಡಿ ಕೃತ್ಯವಾಗಿತ್ತು
ಉಳಿದವರ ಬೆದರಿಸುವ ತಂತ್ರವೂ ಆಗಿತ್ತು
ಎಷ್ಟೋ ದನಿಗಳು,
ಈ ಹರಿದ ನೆತ್ತರ
ಓಕುಳಿಗೆ
ಒಣಗಿ ಹೋಗಿರಬಹುದು.
ಆದರೆ ಆ ನೆತ್ತರು
ಇನ್ನೆಷ್ಟೋ ದನಿಗಳಿಗೆ ಒತ್ತಾಸೆ ನೀಡಿದೆ
ಎಂಬ ಪುರಾವೆಗಾದರೂ
ಒಂದು ಸಾವನ್ನು ನೆನಪಿಡಬೇಕು.
ಹಸಿಯಾಗಿಡಬೇಕು
– ಸುರೇಶ್ ಕಂಜರ್ಪಣೆ




