Wednesday, November 18, 2026

ಪ್ರಾಯೋಗಿಕ ಆವೃತ್ತಿ

ಖಗೋಳ ವಿಸ್ಮಯ | ಮಹಾ ಗ್ರಹಗಳ ಜೋಡಣೆ ; ಬರಿಗಣ್ಣಿಗೆ ಗೋಚರಿಸಲಿವೆ 6 ಗ್ರಹಗಳು !

ಹನಿಯಂಬಾಡಿ ಜಗದೀಶ್

ಬಾಹ್ಯಾಕಾಶದಲ್ಲಿ ವಿಸ್ಮಯಕಾರಿ ಘಟನೆಯೊಂದು ಸಂಭವಿಸಲಿದೆ. ಬರುವ ಜನವರಿ 21 ರಂದು ರಾತ್ರಿ ಮಂಗಳ, ಗುರು, ಯುರೇನಸ್, ನೆಪ್ಚೂನ್, ಶುಕ್ರ ಮತ್ತು ಶನಿ ಗ್ರಹಗಳು ಒಂದಕ್ಕೊಂದು ಜೋಡಿಸಲ್ಪಟ್ಟಿರುವಂತೆ ಒಂದೇ ಸರಳ ರೇಖೆಯಲ್ಲಿರುವಂತೆ ಗೋಚರವಾಗಲಿದೆ. ಇದರೊಂದಿಗೆ ಚಂದ್ರ ಕೂಡ ಎಂದಿನಂತೆ ಗೋಚರವಾಗಲಿದ್ಧಾನೆ. ಈ ವಿಸ್ಮಯಕಾರಿ ದೃಶ್ಯವನ್ನು ಅಂದು ರಾತ್ರಿ ಸೂರ್ಯಾಸ್ತದ ನಂತರ ಪ್ರತಿಯೊಬ್ಬರು ತಾವು ಇದ್ದಲಿಂದಲೇ ಕಣ್ತುಂಬಿಕೊಳ್ಳಬಹುದಾಗಿದೆ.

ಭೂಮಿಯ ಮೇಲೆ ಎಲ್ಲಿಂದಲಾದರೂ ಈ ಗ್ರಹಗಳ ಜೋಡಣೆ ಗೋಚರಿಸುತ್ತದೆ, ಎತ್ತರದ ಸ್ಥಳದಲ್ಲಿ ನಿಂತು ಬಾಹ್ಯಾಕಾಶವನ್ನು ವೀಕ್ಷಣೆ ಮಾಡುವುದರಿಂದ ಅಥವಾ ಬೈನಾಕ್ಯುಲರ್ ಅಥವಾ ದೂರದರ್ಶಕದಿಂದ
ಈ ದೃಶ್ಯವನ್ನು ವೀಕ್ಷಣೆ ಮಾಡಿದರೆ ಸ್ಪಷ್ಟವಾಗಿ ಗೋಚರವಾಗಲಿದೆ. ನೆಪ್ಚೂನ್ ಮತ್ತು ಯುರೇನಸ್ ಹೊರತುಪಡಿಸಿ, ಉಳಿದ ಎಲ್ಲ ಗ್ರಹಗಳು ಬರಿಗಣ್ಣಿಗೆ ಗೋಚರವಾಗಲಿವೆ. ಈ ಗ್ರಹ ಜೋಡಣೆ ಕ್ರಿಯೆಯು ಕೇವಲ ಒಂದು ರಾತ್ರಿಗೆ ಸೀಮಿತವಾಗಿಲ್ಲ, ಅಂದರೆ ಕೆಲವು ಗ್ರಹಗಳು ಮುಂದಿನ  ಹಲವು ರಾತ್ರಿಗಳ ಕಾಲ ಆಕಾಶದಲ್ಲಿ ಗೋಚರವಾಗುತ್ತವೆ.

ಫೆಬ್ರವರಿಯಲ್ಲೂ ಗೋಚರ

ಫೆಬ್ರವರಿ 2025 ರಲ್ಲಿಯೂ ಏಳು ಗ್ರಹಗಳು ರಾತ್ರಿ ಆಕಾಶದಲ್ಲಿ ಏಕಕಾಲದಲ್ಲಿ ಗೋಚರಿಸುತ್ತವೆ, ಇದನ್ನು “ಮಹಾ ಗ್ರಹಗಳ ಜೋಡಣೆ” ಅಥವಾ “ಗ್ರಹ ಮೆರವಣಿಗೆ” ಎಂದು ಕರೆಯಲಾಗುತ್ತದೆ ಖಗೋಳಶಾಸ್ತ್ರಜ್ಞರು ತಿಳಿಸಿದ್ದಾರೆ.

“>

 

ಫೆಬ್ರವರಿ 28ರ ರಾತ್ರಿ ವೇಳೆ ಶನಿ, ಬುಧ, ಶುಕ್ರ, ಗುರು, ಮಂಗಳ, ಯುರೇನಸ್ ಮತ್ತು ನೆಪ್ಚೂನ್ ಗ್ರಹಗಳು ಆಕಾಶದಲ್ಲಿ ಕಾಣಿಸಿಕೊಳ್ಳಲು ಪ್ರಾರಂಭಿಸುತ್ತವೆ. ಈ ಘಟನೆಯು ಪ್ರಪಂಚದಾದ್ಯಂತದ ಜನರ ಆಸಕ್ತಿಯನ್ನು ಕೆರಳಿಸಿದೆ.

ಗ್ರಹಗಳ ಜೋಡಣೆಯ ಸಮಯದಲ್ಲಿ ಏನಾಗುತ್ತದೆ

ಗ್ರಹಗಳ ಜೋಡಣೆಯ ಹೆಚ್ಚಿನ ನಿದರ್ಶನಗಳು, ರೋಮಾಂಚಕಾರಿಯಾದರೂ, ಅಪರೂಪದ ಆಕಾಶ ಚಮತ್ಕಾರಗಳಲ್ಲ ಎಂಬುದು ಕೆಲವು ಖಗೋಖ ಶಾಸ್ತ್ರಜ್ಞರ ಅಭಿಪ್ರಾಯ. ಸೌರವ್ಯೂಹದಲ್ಲಿ ಹಲವಾರು ಗ್ರಹಗಳು ಪ್ರತಿ ವರ್ಷ ಒಂದು ಹಂತದಲ್ಲಿ ಜೋಡಿಸಲ್ಪಡುತ್ತವೆ, ಇದರಿಂದಾಗಿ ಅವು ತಾತ್ಕಾಲಿಕವಾಗಿ ಆಕಾಶದಲ್ಲಿ ಒಟ್ಟಿಗೆ ಕಾಣಿಸಿಕೊಳ್ಳುತ್ತವೆ, ಆ ವಿದ್ಯಮಾನ ಭೂಮಿಯಿಂದ ಗೋಚರಿಸುತ್ತದೆ. ಗ್ರಹಗಳ ಜೋಡಣೆ ಸಂಭವಿಸಲು, ಮೂರು ಅಥವಾ ಹೆಚ್ಚಿನ ಗ್ರಹಗಳು ಸೂರ್ಯನ ಒಂದೇ ಬದಿಯಲ್ಲಿ ಹತ್ತಿರದಲ್ಲಿ ಒಟ್ಟುಗೂಡಬೇಕು (ಇದು ಎರಡು ಗ್ರಹಗಳಿಗೆ ಸಂಭವಿಸಿದಾಗ, ಇದನ್ನು ಸಾಮಾನ್ಯವಾಗಿ ಸಂಯೋಗ ಎಂದು ಪರಿಗಣಿಸಲಾಗುತ್ತದೆ). ಆದಾಗ್ಯೂ, ಏಳು ಗ್ರಹಗಳನ್ನು ಒಳಗೊಂಡ ಸಂಪೂರ್ಣ ಗ್ರಹಗಳ ಮೆರವಣಿಗೆ ಗಣನೀಯವಾಗಿ ಅಪರೂಪ; ಈ ರೀತಿಯ ಘಟನೆ ಕೊನೆಯ ಬಾರಿಗೆ 2022 ರಲ್ಲಿ ಸಂಭವಿಸಿತ್ತು.

ಜೋಡಿಸಿದಂತೆ ಗೋಚರವಾಗುತ್ತವೆ

ಗ್ರಹಗಳು ಕ್ರಾಂತಿವೃತ್ತದ ಮೂಲಕ ಚಲಿಸುವಾಗ ಜೋಡಿಸಿದಂತೆ ಗೋಚರವಾಗುತ್ತವೆ. ಆದರೆ ಅವು ಎಂದಿಗೂ ಸಂಪೂರ್ಣವಾಗಿ ನೇರ ರೇಖೆಯಲ್ಲಿ ಇರುವುದಿಲ್ಲ. ಏಕೆಂದರೆ ಪ್ರತಿಯೊಂದು ಗ್ರಹವು ಕ್ರಾಂತಿವೃತ್ತಕ್ಕೆ ಹೋಲಿಸಿದರೆ ಅವುಗಳ ಸ್ಥಳದಲ್ಲಿ ಸ್ವಲ್ಪ ವಿಚಲನಗಳನ್ನು ಪ್ರದರ್ಶಿಸುತ್ತದೆ, ಅವುಗಳ ಕಕ್ಷೆಗಳು ಸಮತಲದಿಂದ ವಿವಿಧ ಡಿಗ್ರಿಗಳಷ್ಟು ಓರೆಯಾಗಿರುತ್ತವೆ. ಫೆಬ್ರವರಿ 28 ರಂದು, ಏಳು ಗ್ರಹಗಳು ಆಕಾಶದಾದ್ಯಂತ ಕಾಣಿಸಿಕೊಳ್ಳುತ್ತವೆ, ಈ ಸಂದರ್ಭದಲ್ಇ ಗ್ರಹಗಳು ಸ್ವಲ್ಪ ಹತ್ತಿರದಲ್ಲಿವೆ ಎಂಬ ಭ್ರಮೆಯನ್ನು ಸೃಷ್ಟಿಸುತ್ತವೆಯಾದರೂ, ವಾಸ್ತವವಾಗಿ ಬಾಹ್ಯಾಕಾಶದಲ್ಲಿ, ಅವು ಇನ್ನೂ ಲಕ್ಷಾಂತರ (ಶತಕೋಟಿ) ಮೈಲುಗಳ ಅಂತರದಲ್ಲಿರುತ್ತವೆ.

ನಮ್ಮ ಸುದ್ದಿಗಳು ಇಷ್ಟವಾದರೆ ನುಡಿ ಕರ್ನಾಟಕ.ಕಾಂ (ಮಂಡ್ಯ ಡಿಜಿಟಲ್ ಮೀಡಿಯಾ) ಗೆ ದೇಣಿಗೆ ನೀಡಿ ಪ್ರೋತ್ಸಾಹಿಸಿ

Related Articles

LEAVE A REPLY

Please enter your comment!
Please enter your name here

ಅತ್ಯಂತ ಜನಪ್ರಿಯ