ಮಿಜೋರಾಂ ವಿಧಾನಸಭಾ ಚುನಾವಣೆಯ ಮತ ಎಣಿಕೆ ದಿನಾಂಕವನ್ನು ಡಿಸೆಂಬರ್ 3 (ಭಾನುವಾರ)ರ ಬದಲು ಡಿಸೆಂಬರ್ 4 (ಸೋಮವಾರ) ಕ್ಕೆ ಮುಂದೂಡಿಕೆ ಮಾಡಲಾಗಿದೆ ಎಂದು ಚುನಾವಣಾ ಆಯೋಗ ಶುಕ್ರವಾರ ತಿಳಿಸಿದೆ.
ಮತ ಎಣಿಕೆಯ ದಿನಾಂಕ ಬದಲಾವಣೆಗಾಗಿ ಮಿಜೋರಾಂನ ವಿವಿಧ ಕಡೆಗಳಿಂದ ಹಲವಾರು ಮನವಿಗಳು ಬಂದ ಹಿನ್ನೆಲೆ ಬದಲಾಯಿಸಲಾಗಿದೆ ಎಂದು ಚುನಾವಣಾ ಆಯೋಗ ಹೇಳಿದೆ. ಡಿಸೆಂಬರ್ 3 ಭಾನುವಾರವಾದ್ದರಿಂದ ಮಿಜೋರಾಂನ ಜನರಿಗೆ ವಿಶೇಷ ದಿನವಾಗಿದೆ. ಮಿಜೋರಾಂನಲ್ಲಿ ಹೆಚ್ಚಿನ ಸಂಖ್ಯೆಯಲ್ಲಿ ಕ್ರೈಸ್ತ ಧರ್ಮೀಯ ಜನರಿದ್ದು, ಅವರಿಗೆ ಪ್ರಾರ್ಥನೆಗೆ ತೆರಳಬೇಕಿದೆ. ಈ ಕಾರಣಕ್ಕೆ ಮತ ಎಣಿಕೆ ದಿನಾಂಕ ಬದಲಿಸಿರುವ ಸಾಧ್ಯತೆಯಿದೆ.
“ಜನರ ಮನವಿಗಳನ್ನು ಪರಿಗಣಿಸಿ ಮಿಜೋರಾಂನ ವಿಧಾನಸಭೆಗೆ ನಡೆದ ಸಾರ್ವತ್ರಿಕ ಚುನಾವಣೆಯ ಮತ ಎಣಿಕೆ ದಿನಾಂಕವನ್ನು 3ನೇ ಡಿಸೆಂಬರ್, 2023 (ಭಾನುವಾರ) ರಿಂದ 4ನೇ ಡಿಸೆಂಬರ್, 2023 (ಸೋಮವಾರ) ಕ್ಕೆ ಪರಿಷ್ಕರಿಸಲು ನಿರ್ಧರಿಸಲಾಗಿದೆ” ಎಂದು ಚುನಾವಣಾ ಆಯೋಗ ಹೇಳಿಕೆಯಲ್ಲಿ ತಿಳಿಸಿದೆ.
ಮಿಜೋರಾಂ ವಿಧಾನಸಭೆಗೆ ನವೆಂಬರ್ 7 ರಂದು ಮತದಾನ ನಡೆದಿದ್ದು, ಮತ ಎಣಿಕೆ ದಿನಾಂಕ ಡಿಸೆಂಬರ್ 4 ನಿಗದಿಯಾಗಿದೆ. ಛತ್ತೀಸ್ಗಢ, ಮಧ್ಯಪ್ರದೇಶ, ಮಿಜೋರಾಂ, ರಾಜಸ್ಥಾನ ಮತ್ತು ತೆಲಂಗಾಣ, ಈ 5 ರಾಜ್ಯಗಳ ವಿಧಾನಸಭಾ ಚುನಾವಣೆಯ ಫಲಿತಾಂಶವನ್ನು ಡಿಸೆಂಬರ್ 3 ರಂದು ಪ್ರಕಟಿಸಲಾಗುವುದು ಎಂದು ಚುನಾವಣಾ ಆಯೋಗವು ಈ ಹಿಂದೆ ಪ್ರಕಟಿಸಿತ್ತು.
ಮಿಜೋರಾಂ ಹೊರತುಪಡಿಸಿ, ಇನ್ನುಳಿದ ನಾಲ್ಕು ರಾಜ್ಯಗಳಲ್ಲಿ ಡಿಸೆಂಬರ್ 3 (ನಾಳೆ) ಮತ ಎಣಿಕೆ ನಡೆಯಲಿದೆ.